Шупашкарта пурӑнакан Ивенира Сапожникова ӗнер 80 ҫул тултарнӑ. Ҫав ятпа ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем: Александра Смирнова тата Наталия Митрофанова — саламланӑ.
Ивенира Николаевна 1946 ҫулхи кӑрлач уйӑхӗн 21-мӗшӗнче Етӗрне районӗнчи Кӑташ ялӗнче ҫуралнӑ. Пӗр вӑхӑт шкулта пионервожатӑй пулса тӑрӑшнӑ, унтан Шупашкара куҫса килнӗ. Пир-авӑр комбинатне вӑхӑтлӑха тесе вырнаҫнӑ та унта 35 ҫул ӗҫленӗ.
Вӑл мӑшӑрӗпе икӗ ывӑл пӑхса ӳстернӗ. Паян кинемейӗн мӑнуксемпе вӗсен ачи таранах пур. Ҫамрӑксем ватта ҫӑмӑлтарах пултӑр тесе социаллӑ ӗҫчен те тытнӑ. Наталия Митрофановӑна ватӑ ҫын хӑйӗн хӗрӗ вырӑннех хурать. Центрта пӗлтернӗ тӑрӑх, Наталия Станиславовна та ватта чунтан хисеплет.
Пӗлтӗр республикӑри ял хуҫалӑх организацийӗсем теплицӑра 32 пин тонна пахча ҫимӗҫ тата салат туса илнӗ. ЧР Ял хуҫалӑх министерстви пӗлтернӗ тӑрӑх, ку планпа пӑхса хунинчен 10 процент нумайрах. Хӑяр – 19,5 тонна, помидор – 12,5 пин тонна, салат 0,054 пин тонна туса илнӗ.
Республикӑра помидор-хӑяр теплицӑра ытларах туса илекенсем ҫаксем: «Новочебоксарский» теплица комплексӗ тата «Ольдеевский» агрофирма. Иккӗшӗ те Шупашкар округӗнче вырнаҫнӑ. Вӗсем Чӑваш Енре пурӑнакансене хӑяр-помидорпа тивӗҫтереҫҫӗ. Кунсӑр пуҫне хӑйсен продукцине 20 ытла региона ӑсатаҫҫӗ.
Пӗлтӗртенпе вара Етӗрне округӗнчи «Позитив» тулли мар яваплӑ общество салат ӳстерме пуҫланӑ.
Етӗрне районӗнчи В.И.Чапаев ячӗллӗ заводра ӑратлӑ юртӑ лаша ӗрчетеҫҫӗ.
Асӑннӑ заводра нумаях пулмасть «Знамя труда» (чӑв. Ӗҫ ялавӗ) хаҫат тишкерӳҫи пулнӑ, унти ӗҫ-пуҫа паллашнӑ.
Кӑҫалхи утӑ уйӑхӗн 15-мӗшӗнче завод 100 ҫул тултарӗ.
Заводра паян та хӑйсен ӗҫне чунтан юратакансем тӑрӑшаҫҫӗ. Роман Малов Вячеслав Политов, Виктор Чернышов тата ыттисен ӗҫне тивӗҫлипе малалла тӑсать.
Чӑваш Енри муниципалитетсенче те Ҫӗнӗ ҫулта фейерверк яма чарасшӑн. Ҫакӑн пек сӗннӗ республика Элтеперӗ Олег Николаев.
«Шупашкар, Ҫӗнӗ Шупашкар, Улатӑр тата Етӗрне тӑрӑхӗсенче раштав уйӑхӗн 25-мӗшӗнчен пуҫласа кӑрлач уйӑхӗн 11-мӗшӗччен пушара хирӗҫ кӗрешмелли ятарлӑ режим йышӑннӑ. Ытти муниципалитета та вӗсенчен тӗслӗх илме сӗнетӗп», — тенӗ Элтепер.
Асӑннӑ хуласемпе районсенче ҫав вӑхӑтра пиротехникӑпа та усӑ курма чарнӑ.
Етӗрне округӗнче ҪҪХПИ экипажӗ ватӑ хӗрарӑма пулӑшнӑ: вӗсем ӑна каҫхине киле ҫитерсе янӑ.
ҪҪХПИ инспекторӗсем каҫхине ҫул хӗррипе пыракан кинемее курсан чарӑннӑ. Ватӑ хӗрарӑмӑн тумӗ ҫинче тӗттӗмре ҫутатакан хатӗр пулман, сӗм каҫхине вӑл утни лайӑх курӑнман та.
Инспекторсем кинемее тӗттӗмре ҫул хӗррипе пыни хӑрушӑ пулнине ӑнлантарнӑ, кайран вӗсем ӑна хӑйсен машинипе киле ҫитиех леҫсе янӑ.
Етӗрне районӗнчи пӗр ялта пурӑнакан арҫынран коллекторсем укҫа тавӑрса пама тапӑннӑ. Вӑл вара ҫав вӑхӑтра салтакра пулнӑ, кивҫен укҫа паракан нимле организацирен те укҫа илмен. Арҫын пулӑшу ыйтса прокуратурӑна ҫул тытнӑ.
Надзор органӗ тӗрӗсленӗ те 2023 ҫулхи утӑ уйӑхӗнче ҫав ҫын ячӗпе икӗ микрофинанс организацийӗнче 22 пин тенкӗ ют ҫын укҫа илнине палӑртнӑ. Укҫана илме арҫыннӑн паспорт даннӑйӗпе тата кивӗ абонент номерӗпе усӑ курнӑ.
Ҫавна май йӗрке хуралҫисем улталакансем тӗлӗшпе пуҫиле ӗҫ пуҫарнӑ, арҫынна кӑмӑл-сипет тӗлӗшӗнчен шар кӑтартнӑшӑн кредит организацине укҫа тӳлеттерме ыйтса суда тавӑҫпа тухнӑ. Суд прокуратура ыйтнине тивӗҫтернӗ.
Етӗрне районӗнчи Пӗрремӗш Выҫӑлккӑ ялӗнче ӗнер, юпа уйӑхӗн 28-мӗшӗнче, ДОТран (ДОТ тени вӑрах вӑхӑт хӗҫ-пӑшалтан пемелли вырӑна пӗлтерет) мемориал уҫнӑ. Ӑна Сӑр чиккине тума хутшӑннисене асра тытса йӗркеленӗ.
Бетонран тунӑ бетон калпака икӗ ҫул каялла вӑрманта пӗртӑвансем, Леонидпа Михаил Беловсем, тупнӑ. Историксем вӑл чӑн-чӑн ДОТ пулнине палӑртнӑ. Ҫавӑн хыҫҫӑн пӗртӑвансем унран палӑк тума шухӑш тытнӑ.
Мемориала пӗтӗм ялпа тунӑ: чавнӑ, бетон ҫӑрнӑ, йывӑҫ пура копине тимӗр бетонтан ӑсталанӑ.
Етӗрне районӗнчи Депутатсен пухӑвӗн председательне Александр Матвеева йӗрке хуралҫисем тытса чарнӑ. Кун пирки «Правда ПФО» тӗнче тетелӗнчи хаҫат виҫӗмкун пӗлтернӗ.
Депутат усламҫӑ иккен тата вӑл салтаксене пулӑшанҫи пулса ырӑ ятлӑ пулнӑ. Маларах асӑннӑ ҫӑлкуҫа ӗненсен депутат унччен те пӑтӑрмахпа ҫыхӑннӑ, анчах вӑл кашнинчех шывран типӗ тухнӑ имӗш.
Депутат пӗлешне йӗрке хуралҫисенчен пулӑшма шантарса унран укҫа илнӗ тесе шухӑшлаҫҫӗ-мӗн.
Етӗрне округӗнчи арҫын ятарлӑ ҫар операцийӗнче вилнӗ салтакӑн картти ҫинчи 6 миллион тенке илсе хӑйӗн валли моторпа кимӗ туяннӑ, машина кредитне татнӑ. Анчах савӑнӑҫ нумая пыман — куншӑн унӑн судра явап тытма тивнӗ.
Ӗҫ-пуҫ акӑ мӗнлерех пулса иртнӗ: вилнӗ салтакӑн амӑшӗ еткерлӗхе хӑйӗн ҫине тунӑ чухне ывӑлӗн картти ҫинчи укҫа ҫуккине асӑрханӑ. Кайран вӑл ывӑлӗн пӗлӗшӗнче пулни ҫиеле тухнӑ — салтак отпуска килсен ӑна парса хӑварнӑ иккен.
Салтак вилсен вара пӗлӗшӗ картта унра пулнине ҫемйине пӗр сӑмах та шарламан. 2024 ҫулхи авӑн-раштав уйӑхӗсенче вӑл унти укҫана пӗчӗкшерӗн илсе пынӑ.
Арҫын пуҫиле ӗҫ пуҫарсанах салтак амӑшне пӗтӗм тӑкака саплаштарнӑ. Ҫапах суд ӑна 3 ҫуллӑха тӗрмене хупмасӑр айӑплнӑ, 50 пин тенкӗ штраф тӳлеттерме йышӑннӑ. Прокуратура ыйтнипе моторпа кимме патшалӑх валли туртса илнӗ. Ҫапах прокуратура приговор ытлашши ҫемҫе тесе шухӑшлать, машинӑна та конфискацилеме тавӑҫ тӑратнӑ. Ара, кредитне арҫын вӑрланӑ укҫапа тӳлесе татнӑ вӗт.
Шупашкарта пурӑнакан Вера Ятманова паян 102 ҫул тултарнӑ. Кинемее ҫав ятпа Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем саламланӑ. Юлашки вӑхӑтра кинемее асӑннӑ учрежденин социаллӑ ӗҫченӗ киле пырса пулӑшса тӑрать.
Вера Ятманова Етӗрне районӗнче ҫуралнӑ. Вӑл вӑхӑтри нумай ҫын пек вӑрҫӑ вӑхӑтӗнчи тата ун хыҫҫӑнхи ҫулсенчи терте те курнӑ. Кайран, Ял хуҫалӑх институтӗнчен вӗренсе тухсан, зоотехникра ӗҫленӗ. Кайран вӗсем упӑшкипе Шупашкар куҫса килнӗ, кунта Электроаппаратура заводне ӗҫе вырнаҫнӑ.
Мӑшӑр икӗ хӗр ҫуратса ӳстернӗ. Паян ватӑ ҫынна мӑнукӗ тата мӑнукӗн икӗ ачи пӑхать, социаллӑ ӗҫчен вара пулӑшса тӑрать.
Халӗ ватӑ ҫын урама тухса ҫуреймест-ха, анчах хваттерте утса ҫӳрет. вӑй ҫитернӗ ӗҫе хӑех пурнӑҫлать.
+24.3 °C